Naskah Teater Tradisional Minang

Siti Nursian

Tokoh :

• Siti Nursian
• Dt.St.Rajo Mudo (ayah Siti Nursian)
• Siti Rajo Mudo (ibu Siti Nursian)
• Dayang Kairani (kakak Siti Nursian)
• Sutan Amirudin (kekasih Siti Nursian)
• Sutan Mangkutar (yang dijodohkan dengan Siti Nursian)
• Dt.St.Batuah (ayah Sutan Mangkutar)
• Siti Batuah (ibu Sutan Mangkutar)
• Upik Salamat (sahabat Sutan Amirudin)
• Pendekar Leman (pengikut Sutan Mangkutar)
• Pendekar Songsang (pengikut Sutan Mangkutar)

SITI NURSIAN

BABAK I

St.Amirudin      :o… Upik Salamat, upik kamari malah tagak,gadanglah niat jo mukasuik.

Upik Salamat    :Ampun lah ambo dek rang mudo, ampun baribu kali ampun. Manolah mudo Amirudin, apokoh sabab karanonyo, molonyo ambo rang mudo imbau?

St.Amirudin      :Mulonyo upik dek denai imbau, lai basabab bakarano, danga dek upik baritonyo. Lai koh takana dek upik maso saisuak, samaso kito sakola etan di ranah kota Padang, io jo diri Siti Nursian, ati batambah ramuak juo. Talayok pandangan ka mudiak, tampaklah mundam dalam kaco tapian pena ujuang jari, tatukiak pandangan ampiang, nyatonyo putian tak baragi gambaran sayang nan tak sudah, dagang dimalah kasansainyo.

Upik Salamat    :Kalau baitu kato rang mudo, alun diliek la ta paham, lah tantu asa tampek tumbuah. Rantau nan jauah ka kito jalang, etan ka ranah kota padang, kampuang Siti Nursian, samantaro ari alun tinggi, katiko paneh alun garang, kito bajalan lah sakali.

St.Amirudin      :Kalau baitu kato Salamat kito bajalan lah sakali.

(sesampainya di Padang,Upik Salamat memanggil siti Nursian)

Upik Salamat    :Dayang kamari malah dulu, upik salamat nan lah datang.

Dayang Kairani  : Apokoh sabab karanonyo, molonyo ambo dek upik imbau, lai ko batin nan talatak, atau ko rasio nan upik simpan, elok tarangkan kini-kini, nak tantu dayang mamahamkan.

Upik Salamat    :Mulonyo dayang dek diimbau, lai basabab ba karano, danga dek dayang dicuraikan. Denai disuruah dek rang mudo banamo Sutan Amirudin anak rang ranah Lubuak Aluang, io manjapuik Siti Nursian.

Dayang Kairani  :Kalau baitu kato upik adok ka diri badan ambo,upik sarayo maimbau Siti Nursian, manantilah upik disiko nak ambo imbau.

                        Adiak kanduang Siti Nursian, adiak ka mari malah tagak. Diak kanduang Siti Nursian, kito io dijalang Sutan Amirudin anak rang ranah Lubuak Aluang, Sutan Amirudin sadang mananti kito, to melah kito kakian.

Siti Nursian      :Kalau baitu kato kakak adok ka diri badan ambo, kito bajalan lah sakali.

Dayang Kairani  :Upik suruah io maimbau Siti Nursian, io maimbau Siti Nursian, nan dicari lai basuo, ikonyo diri Siti Nursian.

Upik Salamat    :Kalau baitu kato dayang, lah sanang dalam ati, lah sunyi dalam kiro-kiro.

                        Manolah mudo Amirudin,mudo sarayo maimbau Siti Nursian, nan dicari lai basuo, nan dijapuik lai tabao, ikonyo diri Siti Nursian, kaba tasarah pado rang mudo.

St.Amirudin      :Kalau baitu kato upik lah sanang dalam ati.

                        Adiak kanduang Siti Nursian, danga dek siti baritonyo, lai koh takana dek siti, maso daulu samusim maso saisuak, samaso kito sakola, tagamang siti lah denai jawek, tajatuah siti lah denai sambuik, siti kok lai rang panyantun, kok lai ibo jo anak dagang, jujuik lah rindu nan tajombo nak jan momok ditaruah lamo.

Siti Nursian      :o… tuan St. Amirudin, anak rang ranah lubuak aluang, raso ka ramuak ati jo jantuang, apokoh sabab karanonyo, ado koh batin nan talatak atau rasio nan tuan simpan,elok curaikan musim kini, nak tantu Nursian mamahamkan.

St.Amirudin      :Diak kanduang Siti Nursian, kalau baitu kato adiak, tantangan diri badan kito, kok lamo mananguang cinto, mananai dunia nan tak langsuang, antah bak mano pambagian.

Siti Nursian      :Kalau baitu kato tuan adok ka diri badan ambo, kok nyo diri badan ambo, tuan kan lah tau juo, awak miskin duia nak sato, elok lah tuan pikia bana, pikia  daulu pandapatan sasa kudian indak baguno, kaba tasarah pado tuan.

St.Amirudin      :Usah baitu dikatokan, jauah taibo ati denai, siti kan lah tau juo, bia ka jio-jio patuang, Nursian ka denai bimbiang juo, kok lai sa ujuk sapangana, mudahan cinto ka lai satu, sumpah jo satia ka kito karang, baitu ati mangkonyo sanang.

Siti Nursian      :o… tuan St. Amirudin, mandanga kato dari tuan, sanang ati bukan kapalang, raso mandapek hunuang intan, mambayang baying ka muko, aka dapek pangana dating, panuahlah raso ronggo ati. Kok nyo nan badan diri ambo usahlah tuan ragu bana, jawek tangan paganglah jari, Amirudin lahia jo batin, alun ka sanang ati tuan.(sambil bersalaman)

St.Amirudin      :Josuok sambuik kasiah sayang siti, jo kida apuih aia mato, kami babaliak anyo lai.

Siti Nursian      :Tuan mati ambo mangamuak, nak samo-samo bakalang tanah. Kok taragak usah bapasan tuan,dalam mimpi kito basuo.

St.Amirudin      :Tantangan diri badan denai jo Siti Nursian, sumpah jo satia lah bakarang, nan tak lakang dek paneh, bapantang lipua kanai ujan, antah kok Allah manggarakkan.

                        Kini baitulah  dek upik salamat, babaliak pulang malah kito, ka ranah Lubuak Aluang.

Upik Salamat  :Kalau baitu kato tuan, marilah kito bajalan sakali.

St.Amirudin    :Kalau baitu kato salamat, kito bajalan sakali.

BABAK II

Siti Rj. Mudo  :Nak kanduang Siti Nursian, kamari malah anak tagak, ada nan   ka ayah jo bundo rundiangkan, bimbang tarso raso juo.

Siti Nursian   :Manolah bundo jo ayah kanduang ambo,mandanga imbauan dari bundo, tasirok darah didado, ampun dimintak bakeh ayah jo        bundo. Lai kok langkah nan tak elok atau parangai nan tak baiak, curahkan pado ambo, nak tantu Nursian mamahamkan.

Dt.St.Rj.Mudo :Nak kanduang Siti Nursian,mulonyo anak dek diimbau, bukannyo langkah nan tak elok atau parangai nan tak baiak, danga dek anak ayah katokan. Nan ampek jatuah ka bumi nak, nan dirinai pagi jo patang, nan dicinto siang jo malam, tabagi ampek pakaro.Partamo ameh jo perak, kaduo bareh jo padi, katigo anak jo kamanakan, kaampek rumah jo tanggo, ba diri utang pado diri ayah ateh ampek pakaro. Partamo dikamatkan, kaduo dikikahkan, katigo dikitankan, kaampek disarahkan manuntuk ulemu, sikola SD lah tamat,SMP lah tamat pulo, kok sikola lanjutan lai pulo.  Kok umua 21 taun tu dek anak parampuan lah mamanuhi syarat untuak barumah tango.

                      Nak kanduang Siti Nursian,adopun sifat parampuan tabagi ampek,partamo gadih cangkeh, kaduo gadih bungo mawa, katigo gadih bungo dodok,kaampek nan sabana parampuaan.Nan dikatokan sabana parampuan nak,tau ereng jo geneng, kana condong ka maimpok,tau jo lotiang ka manganai, ingek jo runciang ka mancucuak. Nak kanduang pacik pitawek ayah, rundiang sagitu malah daulu, utang jo Nursian ka marangkaikan.

Siti Nursian   :Kalau baitu kato ayah adok ka diri ambo, tantangan pangaja dari ayah, nan indak lupo sasaat yah, haram kok lengah sakotu, siang jadi angan angan, malam jadi mimpi, alah ka sanang ati ayah.

Dt.St.Rj.Mudo :Anak kanduang Nursian, iyo bana kecek urang, sakali marangkuah dayuang duo tigo pulau ta lampaui, danga bana malah dek siti. Diambiak contoh samo gadang, lah dapek jodoh surang-surang, tibo di badan diri siti alun tapakai nan bak urang. Nan patuik bana kito yakini, langkah kito, rasaki kito,partamuan,jo parpisahan atau kamatian kito. Anak kok sampai basuami, kok pulang suami sambuik lah jo muluik manih, edangkan minum jo makanan nyo, biasokan banalah nan ajak itu, caliakkan inyo sadang riang, kok lai suami urang baiak nak, alun di kijok inyo lah tau.

Siti Rj. Mudo  :Nak kanduang tantangan Sutan Mangkutar, kamanakan kanduang dek ayah, antaro Siti Nursian jo Sutan Mangkutar, tagak bak raso samo tinggi, duduak bak raso samo randah, laiko siti manarimo, jawab lah agak sapatah.

Siti Nursian   :Ampunlah ambo ayah jo bundo, ampun baribu kali ampun, kalau baitu kato ayah jo bundoadok ka iri ambo. Kok nyo nan diri Sutan Mangkutar, kamanakan kanduang dek ayah, rancak dek kain nan basalang, licin dek minyak nan bamintak, lakunyo kini, gilo bamain tiok ari, rintang malala patang j pagi, Nursian tak rela tantang itu. Kok ka inyo jannyo ayah lai dek ambo nan taraso,banamo Sutan Amirudin anak rang ranah Lubuak Aluan, niat jo inyo lah sampaikan, baitu ati mangkonyo sanang.

Dt.St.Rj.Mudo :(sambil marah-marah), lah cadiak kau bana kau barundiang, rundiang sia nan kau danga, kato sia nan kau pacik, binguang dima kau bali, kok  cando iko runtuah adat rusak pusako, kini baitulah dek kau, kalau tak suko tantang itu, angkek kaki lambaian tangan, barangkek kau kini-kini, indak bana badan kau Dayang kan lai panggantinyo, ayah alun katagamang, pikia bana lah dek kau dalam-dalam.

Siti Rj. Mudo  :Tanang lah ayah dahulu, bia kito salasaikan  jo nan bana, bia elok untuak kito basamo.

Siti Nursian   :Manolah ayah jo bundo(sambil menangis terisak-isak) kalau baitu kato ayah jo bundo, luruih tak dapek diilakkan, baju sudah ukuran tubuah, utang Nursian mamakaikan, alun kasanang ati ayah jo bundo.

Dt.St.Rj.Mudo :Kalau baitu kecek anak, lah sanang di dalam ati, tinggalah anak jo bundo di ateh rumah, ayah ka bajalan kini.

Siti Rj. Mudo  :Kalau baitu kato ayah bajalan lah sakali nak denai nanti jo siti di ateh rumah.

(Dt.St.Rajo Mudo pergi mencari Dt.St.Batuah ayah Sutan Mangkutar)

BABAK III

Dt.St.Rj.Mudo :Manolah Dt.Sutan Batuah, lai badatuak diateh rumah, kok lai mancoguklah agak sabanta, ado sabuah di sampaikan adok ka diri badan datuak.

Siti Batuah     :Manolah Datuak Sutan Rajo Mudo, mancaliak kadatangan datuak sangat taheran dalam ati, apoko sabab karanonyo, kini baitulah dek datuak, elok dek datuak naiak ka ateh rumah, di rumah kito barundiang, nak dapek kato nan bana, bia denai panggiakan Dt.St.Batuah.

(Siti Batuah masuk, memanggil Dt.St.Batuah,kemudian Dt.St.Batuah keluar)

Dt.St.Rj.Mudo :Mulonyo ambo datang ka mari lai ba sabab ba karano, anga dek datuak baritonyo.Ambo manaruah bungo kambang, datuak bakumbang putiah kaki.

Dt.St.Batuah  :Lah samapi dek datuak.Tantangan rundiang nan mandatang, dek gayuang biaso basambuik, dek kato biaso ba jawab,  gayuang tu datuak lah manyambuik, kato tu datuak lah manjawab, naknyo talatak di tampeknyo, singkek sombah sakian sajo.

Dt.St.Rj.Mudo :Tantangan rundiang nan mandatang, dek gayuang biaso basambuik, dek kato biaso ba jawab,  gayuang tu datuak lah manyambuik, kato tu datuak lah manjawab, bana baitu kato datuak. Kini baitulah dek datuak elok di batang utmbuah baniah, di dahan banyak pangubanyo,eloklah datuak mampalu,ambo di dalam itu pulu.

Dt.St.Batuah  :Lah sanang dalam ati, lah sunyi dalam kiro-kiro. Kok basuo labiah jo kurang, batolong dek datuak di mooh kan.

Dt.St.Rj.Mudo :Manolah Dt.St.Batuah tantangan rundiang datuak tadi lah diukua panjakokan. Ampun jo mooh ambo mintak suko jo rela dari datuak. Ambo manaruah bungo kambang, datuak bakumbang putiah kaki. Kini baitulah dek datuak nak osah siang bak ari, nak tarang bak bulan, pabilo ari kito tatak nan babunyi juo dari datuak.

Dt.St.Batuah  :Ditiliak kutiko limogalah salapan manunjuakkan, saparo bulan ka timbua, disinan niat di sampaikan, baa ati datuak.

Dt.St.Rj.Mudo :Kalau baitu kato datuak,lah saujuk sapangana, mamintak sajo kito ka nan satu salamaik sajolah andaknyo. Kito nan utang malangsuangkan, io bana bak kato urang, lamo duduak taraso panek, lamo tagak taraso paniang, ambo nan mintak turun tanggo, pulang ka tampek masiang-masiang, nak mintak izin juo dari datuak.

Dt.St.Batuah  :Dek pintak biaso babari, dekkondak biaso balaku, di lapeh jo ati nan suci, jo muko nan janiah, alun ka sanang ati datuak.

Dt.St.Rj.Mudo :Jikok baitu kato datuak ambo utang mamakaikan.

(Dt.St.Rj.Mudo lalu pergi)

BABAK IV

Siti Batuah     : Nak kanduang Sutan Mangkutar, kamari malah anak tagak, ada nan ka ayah jo bundo rundiangkan, bimbang tarso raso juo.

St.Mangkutar :Ampunlah ambo bundo kanduang, apokoh sabab karanonyao, mulonyo ambo dek ayah jo ibu imbau, lai koh kojo nan ka dikakok atau ko kojo nan indak sudah, curahkan pado ambo, naknyo sanang dalam ati.

Dt.St.Batuah  :Nak kanduang, Sutan Mangkutar mulonyo anak dek diimbau, lai ba sabab ba karano, danga dek anak baritonyo. Iduik di ateh dunia nangko ado duo, partamo di ateh awing awing, kaduo sabana di ateh bumi. Nak kanduang, Sutan Mangkutar kok anak tagak di nan rami pandai pandai ba niago. Kok bajalan caliak-caliak,tengok suok kida nak salamaik parjalanan.

Siti Batuah     :Nak kanduang, Sutan Mangkutar, pacik pangaja ayah, rundiang sakitu dulu, utang dek anak mamakaikan.

St.Mangkutar :Kalau baitu kato ayah adok ka diri ambo, tantangan pangaja dari ayah, nan indak lupo sasaat yah, haram kok lengah sakotu, siang jadi angan angan, malam jadi mimpi, alah ka sanang ati ayah jo bundo.

Dt.St.Batuah  :Kalau baitu kato anak lah sanang dalam ati, tando pangaja lah batarimo.

Siti Batuah     :Danga dek anak bundo katokan, tantangan diri ayah, dijalang dek Dt.St.Rj.Mudo, nan niaik makasuik atinyo nak maminang Sutan Mangkutar untuak Siti Nursian, lai ko suko anak manarimo, ayah nan utang malangsuangkan.

St.Mangkutar :Kalau baitu kato ayah jo bundo kadiri ambo, tantangan diri ambo ayah lah tau juo, nan niaik makasuik ati ka maninggakan kampuang pai marantau,, etan ka luak limo puluah, satibo di sinan yah indak mancari ameh jo perak, tantangan rundiangan ayah iyo pulo malah kironyo, aluran diri ambo jo diri Nursian, niat kudian lah sampaikan, bari izin ambo bajalan.

Dt.St.Batuah  :Mandanga uraian anak ka diri ayah, taheran dalam ati, sababkan baa dek baitu, anak tacinto nak marantau, etan ka rantau nan piatu,di dalamluak limo puluah. Nak kanduang Mangkutar, kini baitulah dek anak, sakotu ayah lai iduik, sakutiko ayah lai siat,nan niat mukasuik ayah, tantangan diri anak jo Siti Nursian,niat tu iyo ka di sampaikan, baa nyo anak nan utang malangsuangkan.

St.Mangkutar :Ayah kanduang badan dek ambo, kalau baitu kato ayah, lah nyato tarang bak bulan, utang di ambo mamakaikan, nan diri ambo ko yah, as alai titiak dari ateh, tibo di bawah nak di tampuangkan, kaba tasarah pado ayah.

Siti Batuah     :Kalau baitu kato anak lah sanang dlam ati.

Dt.St.Batuah  :Ayah nan utang malangsuangkan, nak kanduang anak tinggalah di ateh rumah, ayah bajalan daulu.

(Datuak batuah pergi, Datuak batuah dan Dt.St.Rj.Mudo menunggu waktu pernikahan anak mereka)

BABAK V

St.Amirudin    :o… UpikSalamat, upik kamari malah tagak,gadanglah niat jo mukasuik

Upik Salamat  :Ampunkan diri ambo rang mudo, satu sbaribu ampun. Manolah mudo Amirudin,apokoh sabab karanonyo mulonyo denai dek diimbau wakatu kini ko. Elok curahkan pado ambo, nak tanang kiro-kiro.

St.Amirudin    :Mulonyo upik dek diimbau wakatu kini ko, lai basabab, saparo malam ka siang tibolah mimpi nan manjagokan, mimpi nan elok buruak antah mimpi antahnyo rasio, nan jadi buah mimpi. Bialah songsong runuik sarato galah nan salapan, caliak lah buah mimpi amabo, baaitu ati mangkonyo sanang.

Upik Salamat  :Manolah mudo Amirudin, kalau baitu kato rang mudo adok ka diri denai, usah picayo jo rasian baru tasintak apo tio, bia manitih mato podang, bia manantang mato ari, Nursian ka kito cari juo, kini baitulah dek rang mudo. Rantau nan jauah ka kito jalang, etan ka ranah kota padang, kampuang Siti Nursian, samantaro ari alun tinggi, katiko paneh alun garang, kito bajalan lah sakali.

St.Amirudin    :Kalau baitu kato upik adok ka diri ambo, marilah kito bajalan  sakali.

BABAK VI

St.Amirudin    :O… upik salamat,lah tibo kito di siko, iyo labuah simpang tigo, latiah jo panek lah taraso, baranti awak di siko dulu, baa nyo ati Salamat.

Upik Salamat  :Kalau baitu kato rang mudo, baranti malah kito di siko.

(sewaktu St.Amirudin dan Upik Salamat duduk termenung datanglah SitiNursian dan Dayang Kairani)

Dayang Kairani:Baa ko tuan dek duduak tamanuang, dimako kiro-kiro kini.

Siti Nursian   :Dalam daerah tujuah kampuang, surang tuan pautan hati, nan lain buliah di haramkan.

Dayang Kairan :Bungo satangkai duo ragam piliah dek tuan ma nan ka tuju.

St.Amirudin    :Diak kanduang Siti Nursian, indanyo duduak dek tamanuang, indaknyo tagak dek ba pegu,denai mandandanga-danga bunyi, kaba di bawo angin lalu, barito di gungguang buruang tabang, kok iyo iyo rundiangkan kok bana bana rundinagkan, jawablah kato agak sapatah jan bacando iko juo.

Siti Nursian   :O… tuan St.Amirudin duo jo upik salamat,kalau baitu kato tuan adok kadiri ambo, danga dek tuan baritonyo, dek paso ayah jo mandeh, sapakat niniak jo mamak baitu asa mulonyo, dek ambo kasiah lah mandalam dek tuan babao lengah, nan labiah ban ambo risaukan iyo ka diri badan tuan, tuan kok ganggam ganggam baro taraso angek malapehkan, kapulang mandeh kok berang, rang kampuang jojok pulo. Kalau tasuo nan ajakitualamat ka sansai badan ambo, kok basuo kato urang, nan jan tasuo nan jak itu elok lah tuan pikia panjang.

St.Amirudin    :Kini baitulah dek adiak, kok lai saujuk sapangana, mudahan cinto kok lai satu, to melah kito ka surau datuak ongko Imam Mudo, supayo karuah nan nyo janiah.

Siti Nursian   : O… tuan St.Amirudin kalau baitu kato tuan adok kadiri ambo, dek kito ka pai kian, lai dek ambo nan takana.

Upik Salamat  :Kalau baitu kato rangmudo adok ka diri badan denai, sabalun ari tinggi ,sabalun paneh garang, kito bajalan lah sakali.

BABAK VII

Dt.St.Batuah  :Manolah Dt.Sutan Rj.Mudo lai badatuak diateh rumah, kok lai mancoguklah agak sabanta, ado sabuah di sampaikan.

Siti Rj. Mudo  :Manolah Dt.St.Batuah baduo jo Siti Batuah, apokoh sabab karanonyo, dek tibo datuak musim kini. Bia denai panggiakan Dt.Sutan Rj.Mudo ka dalam,tunggulah dek datuak sabanta.

Dt.St.Batuah  : Manolah Dt.Sutan Rj.Mudo, bamulo ambo dek datang, tantangan diri Nursian turun nan sajak dari rumah, indak babaliak naik lai.

Siti Batuah     :Apokoh sabab karanonyo mako tajadi nan jak itu, adat di mano nan datuak pakai, kalau nan bak cando iko bana ambo indak basanang ati, kok tak lalu dandang di aia, di gurun ka ambo tajakkan juo, pikialah datuak tantang itu.

Siti Rj. Mudo  :Jan lai datuak tarabo-rabo,

Dt.St.Rj.Mudo :Sababkan baa dek baitu, tantangan diri Siti Nursian, inyo di baok Sutan Amirudin, etan ka ranah aia putiah, alah ka tarang tudek datuak , baa ka eloknyo.

Siti Batuah     :Tipak didiri badan ambo, makonyo ati ka sanang,kusuik kok indak ka salasai, ambo mancarijalan lain kaba tasarah dek datuak.

Dt.St.Rj.Mudo :Adok ka diri badan ambo, musuah nan indak ambo cari, kok basuo pantang di ilakkan, samo mancari jalan malah kito.

                      (Dt.St.Batuah dan istrinya lalu ergi tanpa pamit)

BABAK VIII

Siti Batuah     :Nak kanduang St.Mangkutar, anak kamri malah tagak, ado sabuah ka dirundiangkan.

St.Mangkutar :Ampunlah ambo bundo kanduang, apokoh sabab karanonyao, mulonyo ambo dek ayah jo ibu imbau, lai koh kojo nan ka dikakok atau ko kojo nan indak sudah.

Dt.St.Batuah  :Nak akanduang anak diimbau lai basabab,baasa mako ka bajadi, tantangan diri Nursian turun nan sajak dari rumah, indak babaliak naik lai. Anak kan lah tau juo, indak ado do malu samalu ko, malu tacoreng nan di kaniang, kok lai tacoreng di pungguang lai bisa ditutuik jo bajo,supayo malu nak ta pupuih, anak pail ah ka ranah ngalau batu, manamui duo pandeka, nantuo banamo pandeka Songsang,nan mudo banamo pandeka Leman.

Siti Batuah     :Asa tibo anak di sinan sabuikkan gala ayah, tu agiah pitih agak saketek paubek jariah nyo, sagirolah buyuang pai.

St.Mangkutar :Kok baitu kato ayah ka diri denai, sajak daulu lah den katokan indak ayah latakkan di dalam hati, ayah buang sajo ka balakang, badan denai juo nan manangguangkan.Ambo bajalan lah sakali, rimbo kok banyak bapangguni, tolonglah dek ayah dari belakang, ambo bajalan hanyo lai.

Siti Batuah     :Nak kanduang St. Mangkutar, anak bajalan sakali, bundo do’akan dari balakang pintak kito ka nan satu, salamaik andaknyo pulang pai.

St.Mangkutar :Kalau baitu kato bundo ambo bajalan sakali.

BABAK IX

P.Leman&

Songsang        :Heeiiii………manolah dagang nan lau,sia namo sia gala ,bukak baju bukak deta,agiahkan ka denai,kok indakaden balah ampek kapalo waaang.

St.Mangkutar :Mamak nan baduo usah pangguluik panggulasang, urang pangguluik lambek tibo, panggulasang mati jatuah.

P. Songsang    :Heiiiii……waang katokan tukang panjek kami ah, den balah ampek kapalo waang(Sambil mendekat pada Mangkutar)

St.Mangkutar :Manolah mamak nan baduo, usah panggulik panggulasang, tantangan diri ambo ka mamak,ambo St.Mangkutar anak dek Dt.St.Batuah, alah ka jaleh tu dek mamak, manyamun dagang nan ampek partamo banamo St. Amirudin,Upik Salamat,Siti Nursian, jo Dayang Kairani.Cubolah mamak pikia tantang diri ambo, sadang baralek marapulai datang alang nan manyawek,nyo gungguang sajo,lapeh lah dari tangan tak dapek di awai lai, tolonglah badan ambo dek mamak.

P.Leman          :o… kok waaang mintak tolong pado kami lah jaleh dek waang, bajalan ba aleh tapak, bajantiak basambuang kuku, mangecek basambuang lidah, lai jaleh dek waang Pitiiiih…

St.Mangkutar :Iko pitih dek mamak sarato ameh, ambiak lah kasadonyo, alah ka sanang ati mamak.

P. Songsang    :Alah sang ati kami, tapi tontang St. Amirudi jo a inyo ka lalu, nak tantu kami manantikan.

St.Mangkutar :Inyo bajalan kaki manuju ranah Aia Putiah, kini baitu salamo kito barundiang kok ado salah tolong di moohan,mamak tinggalah di siko kakok karajo surang-surang,denai babaliak pulang anyo lai.

P.Leman          :Kok baitu pulang lah lei, kami ka mananti St. Amirudin lai.

BABAK X

St.Amirudin      :o… upik lah lamo kito bajalan, panek lah taraso, baranti malah      kito di siko.

Upik Salamat    :Kok baitu baranti  malah kito.

                        Jan lamo-lamo pulo kito baranti lai aril ah tinggi juo, kito ansua lah bajalan.

St.Amirudin      :Kok  baitukito bajala malah sakali,etan bak rang panyamun tampaknyo a, baa nyo dek salamat, kaba tasarah jo salamat.

Upik Salamat    :Tantangan rang penyamun sarahkan sajo ka diri ambo,

                        (ketika upik salamat sedang berbincang dengan sutan Amirudin 2 pendekar menyerang, terjadilah perkelahian,namun berkat kesaktian upik salamat 2 pendekar kalah, setelah mereka kalah, St. Amirudin minta ditunjukkan jalan ke Aia Putiah pada mereka,setelah itu pamit)

St.Amirudin      :Manolah mamak nan baduo,mamak tinggalah disiko kami bajalan lai

P.Leman&

Songsang          :Kalau baitu kato rang mudo,bajalan lah sakali, kami tingga di sio, agiah lah pitih agak saketek ka lapeh jariah kami.

St.Amirudin      :Iko pitih agak saketek barang paragiahan dari kami, aliahlah karajo lain dari iko, pabanyak amal ibadah, acok-acok datang ka munsajik nak jan sarupo iko juo.

----------------------------------------------------------------------------------------

St.Amirudin      :Rang panyamun lah nyato kalah,kini baitu dek salamat, kito ansua bajalan lei.

Upik Salamat     :Kalau baitu kato rangmudo adok ka diri badan denai, sabalun ari tinggi ,sabalun paneh garang, kito bajalan lah sakali.

Keterangan       :(St. Amirudin,Upik Salamat,Siti Nursian, jo Dayang Kairani ba jalan manuju ranah Aia Putiah, kasurau DT.ongku Imam Mudo untuk menikah, antara St Amirudin dengan Siti Nursian)

Posted in: Minang, Naskah, Siti Nursian, Teater